政府年金

最近政府推出長者年金，正巧兩大長老也合資格申請，故花了點時間在網上找資料研究研究。大致歸納重點如下：

一．入場費五萬，上限一百萬。
二．以一百萬為例，申請者可以每月可提取數男為5800元，女為5300元，直至百年歸老。
三．假如該長者在發放1,050,000元前已過身，其受益人可收取餘下期數或一筆過現金。

簡單而言，長命有「著數」。假設一男長者65歲申請一百萬，並開始每月提取5800元，14年5個月後，即這位長者七十九歲時便提完一百萬，往後便是「賺」了。現在香港人平均預期壽命男性為81.3歲，女性為87.1歲算，即平均男性可收到1,134,480元，女性即是1,405,560元，看來，女性買年金的誘因較大，而政府公佈內部回報則為約4%。

在找資料同時，也發現到有不少對此計劃貶斥的聲音，也順便歸納如下：

一．回報太低，買高息股如滙豐建行領滙也3-5%息。

二．回報太低，現在銀行定期可做約2%，覆息計算下會比年金多。

三．回報太低，買大屋苑樓收租都有2-3%回報，樓還會升值。

這些意見一般認為，「年金回報得雞碎咁多，我買咩咩咩好過啦」。事實上，每種投資物都應有其特性，未必會完全比另一種好。高息股是高息，但其價格可極其波動，滙豐最低3X最高15X，派息比率也是沒有保證，大家還記得8號仔的故事嗎？銀行的定期覆息回報算法是基於本金利率也不能提取，不能做到月月有糧出的效果。買大屋苑樓收租嘛，首先，樓不是保證不會跌的，另外，在今天的大屋苑市場放租物業，在扣除佣金管理費差餉裝修後，真不容易可做到2-3%年回報。最最最重要的一點，65歲時不容易申請按掲，可能要FULL PAY啊。

事實上，相信人到「六張幾」時，萬一投資賭輸了不容易從頭再來，故需要的應該是「穩定」及「現金流」，這年金計劃正正附合這需求。當然，要「賺價」「高息」，它便沒有其他投資物好。退休時可視乎財產數目和自身財力「做了幾十年人應要有自知之明」，適量分散投資，個人認為，這個政府年金計劃，多多少少放點錢進去還是不錯的，人的平均壽命很大機會是越來越長嘛。我也不知道到了七、八十歲是否還有精力像現在又攪IB又攪樓哦！

苦行僧式儲錢

想起最近看到某文章﹙已忘記出處﹚提到，人生在世，只活最多約三萬日，故應及時行樂，苦行僧式儲錢的生活方式實在是浪費生命。

回顧自己的消費模式，一向是奉行應花得花，不應花就不花（自以為）的態度，行使多年久早已習慣，也不覺自己是苦行僧。當然，可能是因為還有大量省錢的進步空間有待發掘。小弟有一省錢絶活，就是每當有大額消費抉擇時，先想想這批金額可為財自目標貢獻多少，跟著便自然會再三思才做決定，例如要用兩萬元，用一個保守的年回報如5%去計算，花費這兩萬元便等於人生以後每年約一千元的被動收入，這項消費是否值得呢？有這個想法，便會少買很多想要而非需要的物品。

其實，是否省錢省得像苦行僧，相信還是看個人心態，有家庭每月一兩萬就夠，同時也有些個人單身認為四、五萬都唔夠使。每個人都需要找到一個能配合自己理財目標的消費模式。如慳得太辛苦便要調整了，節流不行便花多點心思開源吧。

不知各位有什麼節流心得呢？

以下是小弟一家三口連工人的六月開支，多了朋友聚會，也有請友人回家吃飯，故「食」方面的支出多了點。當然，一如以往，主要的開支還是住屋和小孩教育。

香港的生活成本

最近內子轉工，待在家等返新工，湊巧工人姐姐要回印尼一個月，造就內子一嘗做職全媽媽的滋味，每天自己煮飯做家務，帶小朋友返學放學，大人細佬都開心。

往日大家忙於工作，很多時間都不在香港。借此機會，小弟亦對家中的日常事務參與多了，來個簡活，也有點體會。

小弟一向也有記賬習慣，有一個記賬APP用了多年，對自己個人及家庭的開支也會記錄。這個簡單的五月，家庭開支如下︰

其實，香港地，如果不考慮住的成本，多買餸煮飯，簡簡單單生活的話，也不算花很多。

最貴的，還是住屋，還有小孩子的讀書學習費用。

扣除住屋和小朋友讀書，整個月才一萬元左右！

不知大家的家庭開支比例又是否差不多？

閱讀分享–巴菲特 致股東的信

還記得高中時，我最喜愛經濟科。什麼ISLM CURVE，DEMINISHING MARGINAL LAW OF RETURN等等，好像坐在課室裏已把世界的經濟都看透了似的，當時還是莘莘學子的我對此十分著迷。

有共鳴的中佬們，相信到今天你還可以隨口諗出OPPORTUNITY COST的DEFINITION，攞得一分得一分嘛。仲有，答完題目記得寫埋OTHER THINGS BEING CONSTANT，一百分。

學苑派理論，都是基於IN EQUILIBRIUM，PERFECT INFORMATION，而事實上，理論歸理論，這世界從來都沒有PERFECT，正如謝安琪唔會有兩個。

初時投身社會，有著BBA的加持，初生之犢不畏虎，從零七年的30000點，到零八的12000點屢戰屢敗，屢敗屢戰。驀然回首，青春就留下了一堆蟹貨。

當時，百思不得其解，什麼BETA，SD，技術分析我都略有研究，究竟係咪個天都唔鐘意我？直至，睇到一本書，「巴菲特致股東的信」，巴老深入淺出，把他的實戰投資理念，配以風趣幽默的比喻，詳加闡述。這位年近九旬的老人家，對投資，甚至人生都看得很清楚。

一句 PRICE IS WHAT YOU PAY，VALUE IS WHAT YOU GET，尤其深刻。如果你還沒有看過，誠意推薦，這是一本不能錯過的好書。最近好像出了新版，不妨去看看這位全球巨富的智慧。

中佬的錬成

狗頭最近無意中看到許久沒用的GOOGLE CHROME裡的BOOKMARK記錄，應該是差不多八至十年前建立，都是一些關於車，錶，手機，單車，相機鏡頭，名牌戶外用品等等的網站，還記得當年每天起床都要逐一去看看有否更新，勤力過返工。這就是我青春的一部份，實在浪費了不少時光。

回看今天的BOOKMARK，就只有一些如FED FUNDS RATE FORECAST一類的工具網站了。瀏覽習慣也不同了，不會每天追著，有需要時才去看看，有空餘時，做做運動睇睇書來得更實際。看著當年的消費品BOOKMARK，實在是提不起興趣，一個一個地刪除了。

導致這樣心態上的變化，究竟是因為狗頭自成為一個上有高堂下有妻女典型八十後中佬後生活迫人所致；還是，這是大部份男人人到中年因為賀爾蒙分泌既不同而做成的心理改變？

從前喜歡追新玩意，記得狗頭以前有一句「買電子用品一係唔買，一買就要買最新」；到現在，三千蚊左右貨仔的手機，已經用了差唔多年半，希望可以繼續用。每看到新款手機的各樣新功能，也找不到一個換機的理由。其他的隨身用品，都是基於簡單，耐久，實用的準則買下來，不需常常更換。

失去了對消費品的追求，取而代之，對一些比較恒久的東西，例如是知識、或是能提供穩定現金流的資產，卻是寤寐求之。這亦是小弟開始寫BLOG的原因，希望把一些自己的想法作記錄，十年後又來看看；更重要的是自己從很多BLOGGER身上學到不少，希望一方面可以分享自己對財務安排的看法，另一方面能在這個平台能跟各位多多交流，集思廣益。

各位中佬，你有無同感?

加息，港樓跌市撈底？

大家都見到個樓市升左十幾年，去到今日高位CCL174，仲要好似唔識停咁繼續升，俾人既感覺就係個市真係硬過條鐵，金槍不倒。

當大家都仲係GOGOGO既時候，美國就一路行緊佢既加息週期，究竟加息可唔可以推郁呢支金槍？

其實，美國從2015年底開始，由0.25厘到今日既1.75厘，都加左息幾年啦。當然，你實會話，香港未加嘛。事實上，香港都加左既，個1MONTH HIBOR，由2015年底既0.19厘，升到現在0.99厘，只係個PRIME RATE未郁，同埋個幅度無美國升得咁快啫。大家都推測，2018年尾個香港PRIME RATE都始終會跟美國息口向上調。我地不如就當香港個P會今年加1次，下年加夠4次，咁供樓既情況會係點呢？

當一個普通香港年輕家庭，兩公婆做野，每人搵三萬月薪左右，上有高堂下有小孩，以為自己係中產，但係又個個月無咩錢剩咁既中產。有樓既，當佢地孭住約五百萬既按揭貸款，加息五次，即係加1.25厘，每月既供款就會由18858加到22174，即係三千三蚊。老老實實，呢個家庭，會唔會因為每個月要俾多三千蚊供樓，而就去恐慌性咁放樓呢？依我既狗見就真係唔會既。不過，就未必會咁進取去加按買多層啦。而未有樓既，就更加有藉口唔買住，去多兩次日本先講，繼續租樓日日賺。咁個所謂既鋼性需求，其實都好FLEXIBLE既，你睇2016時個樓市都可以跌兩三成。

所以，一旦香港加息，在氣氛影響下，港樓多多少少會受下壓，甚至乎會跌些少既。記住，係跌些少，唔會多過20%，尤其因為有左兩年前既經驗。當然，如果港息下年加唔止4次，我相信會跌多點，但係大家睇番美國既經濟數據，係咪真係會加得咁急呢，小弟就有點保留。

大家睇到呢度，無樓既朋友就會話，「嘩，黎緊跌一兩成，咁就緊係租住日日賺先啦﹗」咪住，加息還加息，但係個按揭供款都有其他因素影響既。正所謂上有政策下有對策，銀行都要做生意架，佢地都已經由之前既H+1.7%，改到去H+1.28%，最近仲攪埋個首年1.68%定息計劃出黎，多多少少將個加息既影響減低。狗頭就好期待往日個H+0.65%喇。

仲有，等跌撈底，係有成本既，一係租樓既成本，二係睇錯市既風險成本。試幻想下，假如，假如啫，美國佬加多幾次息之後，發覺個經濟真係頂唔順，一個UPSIDE DOWN突然同大家講話要減息刺激經濟，仲等緊機會入市既你，心情會係如何呢？

總結一大堆狗噏，大家活在一個將來是未知數既世界，唯一知道既係，住，係必需既。未有樓而有能力買到樓既朋友，睇好後市既，咪買間大囉；睇淡既，咪買間細囉。今日你仲可以賭佢跌，但係唔知你聽日仲賭唔賭得起。

買滙豐好過買樓？

首先利申下，標題所講並非狗頭狗見，而是湯博士近日所提出的高見。
原文轉載於始。
大致意思就是有個對夫婦有1200萬在手，聽完湯博士講，滙豐三年到150，就1200萬all in 滙豐，接著跟業主簽訂三年租約，三年後再睇買唔買樓。
計下數，1200萬滙豐，用現價75元計，假設無槓桿，股息回報約為5.4%，即一年收息約65萬，三年195萬。
手持1200萬現金，基於今天過千萬物業只準五成按揭的規則下，假設該夫婦目標物業的價格約為2000萬。市場上一個2000萬的物業，大約每月租金為4萬左右。
如果咁計，租樓後每月還有約1.4萬作儲蓄，other things being constant，三年後便有大概有50萬。
講到呢到，好似唔錯喎，住既質素可以保持之餘又有點錢可以儲下，好deal喎。仲有，滙豐仲會聽湯博士話，三年後見150。到時手持2400萬股票，又有好多選擇囉。

好啦，好既一面講完，就到相反既一面，凡事都要諗worst scenario嘛。滙豐呢，唔好講當年33咁極端，前年就試過插到50左右，咁即係1200萬得番800萬。當然，如果滙豐到時繼續派番65萬一年俾該對夫婦，咁佢地咪繼續租樓日日賺囉。但係上市公司，好難講喎，大家都估唔到滙豐都要供股啦。

其實講左咁多，想帶出既係應唔應該把一家人居住既福祉，放哂响一間5號仔？手持1200萬，就算睇淡樓市，可唔可以買番層細價放租，買幾條公司債，再分些少錢去買佢最愛既滙豐呢？係，滙豐到150時我賺唔盡，但係咁樣做既話現金流好管理左之餘，風險又分散左，按我既狗見就一定會咁做。

諗深一層，湯博士咁多億身家，肯家有更多高明既理財方法。從細價樓爆煲論到滙豐三年一五零，又真係幾吸引到眼球，幾有娛樂性既，無論細價樓有無爆，或者三年後滙豐到唔到150，湯博士的目的可能都已達到。

打完成篇文，腦中不禁浮現出一句「認真便輸了」。