閱讀分享–巴菲特 致股東的信

還記得高中時，我最喜愛經濟科。什麼ISLM CURVE，DEMINISHING MARGINAL LAW OF RETURN等等，好像坐在課室裏已把世界的經濟都看透了似的，當時還是莘莘學子的我對此十分著迷。

有共鳴的中佬們，相信到今天你還可以隨口諗出OPPORTUNITY COST的DEFINITION，攞得一分得一分嘛。仲有，答完題目記得寫埋OTHER THINGS BEING CONSTANT，一百分。

學苑派理論，都是基於IN EQUILIBRIUM，PERFECT INFORMATION，而事實上，理論歸理論，這世界從來都沒有PERFECT，正如謝安琪唔會有兩個。

初時投身社會，有著BBA的加持，初生之犢不畏虎，從零七年的30000點，到零八的12000點屢戰屢敗，屢敗屢戰。驀然回首，青春就留下了一堆蟹貨。

當時，百思不得其解，什麼BETA，SD，技術分析我都略有研究，究竟係咪個天都唔鐘意我？直至，睇到一本書，「巴菲特致股東的信」，巴老深入淺出，把他的實戰投資理念，配以風趣幽默的比喻，詳加闡述。這位年近九旬的老人家，對投資，甚至人生都看得很清楚。

一句 PRICE IS WHAT YOU PAY，VALUE IS WHAT YOU GET，尤其深刻。如果你還沒有看過，誠意推薦，這是一本不能錯過的好書。最近好像出了新版，不妨去看看這位全球巨富的智慧。

中佬的錬成

狗頭最近無意中看到許久沒用的GOOGLE CHROME裡的BOOKMARK記錄，應該是差不多八至十年前建立，都是一些關於車，錶，手機，單車，相機鏡頭，名牌戶外用品等等的網站，還記得當年每天起床都要逐一去看看有否更新，勤力過返工。這就是我青春的一部份，實在浪費了不少時光。

回看今天的BOOKMARK，就只有一些如FED FUNDS RATE FORECAST一類的工具網站了。瀏覽習慣也不同了，不會每天追著，有需要時才去看看，有空餘時，做做運動睇睇書來得更實際。看著當年的消費品BOOKMARK，實在是提不起興趣，一個一個地刪除了。

導致這樣心態上的變化，究竟是因為狗頭自成為一個上有高堂下有妻女典型八十後中佬後生活迫人所致；還是，這是大部份男人人到中年因為賀爾蒙分泌既不同而做成的心理改變？

從前喜歡追新玩意，記得狗頭以前有一句「買電子用品一係唔買，一買就要買最新」；到現在，三千蚊左右貨仔的手機，已經用了差唔多年半，希望可以繼續用。每看到新款手機的各樣新功能，也找不到一個換機的理由。其他的隨身用品，都是基於簡單，耐久，實用的準則買下來，不需常常更換。

失去了對消費品的追求，取而代之，對一些比較恒久的東西，例如是知識、或是能提供穩定現金流的資產，卻是寤寐求之。這亦是小弟開始寫BLOG的原因，希望把一些自己的想法作記錄，十年後又來看看；更重要的是自己從很多BLOGGER身上學到不少，希望一方面可以分享自己對財務安排的看法，另一方面能在這個平台能跟各位多多交流，集思廣益。

各位中佬，你有無同感?

加息，港樓跌市撈底？

大家都見到個樓市升左十幾年，去到今日高位CCL174，仲要好似唔識停咁繼續升，俾人既感覺就係個市真係硬過條鐵，金槍不倒。

當大家都仲係GOGOGO既時候，美國就一路行緊佢既加息週期，究竟加息可唔可以推郁呢支金槍？

其實，美國從2015年底開始，由0.25厘到今日既1.75厘，都加左息幾年啦。當然，你實會話，香港未加嘛。事實上，香港都加左既，個1MONTH HIBOR，由2015年底既0.19厘，升到現在0.99厘，只係個PRIME RATE未郁，同埋個幅度無美國升得咁快啫。大家都推測，2018年尾個香港PRIME RATE都始終會跟美國息口向上調。我地不如就當香港個P會今年加1次，下年加夠4次，咁供樓既情況會係點呢？

當一個普通香港年輕家庭，兩公婆做野，每人搵三萬月薪左右，上有高堂下有小孩，以為自己係中產，但係又個個月無咩錢剩咁既中產。有樓既，當佢地孭住約五百萬既按揭貸款，加息五次，即係加1.25厘，每月既供款就會由18858加到22174，即係三千三蚊。老老實實，呢個家庭，會唔會因為每個月要俾多三千蚊供樓，而就去恐慌性咁放樓呢？依我既狗見就真係唔會既。不過，就未必會咁進取去加按買多層啦。而未有樓既，就更加有藉口唔買住，去多兩次日本先講，繼續租樓日日賺。咁個所謂既鋼性需求，其實都好FLEXIBLE既，你睇2016時個樓市都可以跌兩三成。

所以，一旦香港加息，在氣氛影響下，港樓多多少少會受下壓，甚至乎會跌些少既。記住，係跌些少，唔會多過20%，尤其因為有左兩年前既經驗。當然，如果港息下年加唔止4次，我相信會跌多點，但係大家睇番美國既經濟數據，係咪真係會加得咁急呢，小弟就有點保留。

大家睇到呢度，無樓既朋友就會話，「嘩，黎緊跌一兩成，咁就緊係租住日日賺先啦﹗」咪住，加息還加息，但係個按揭供款都有其他因素影響既。正所謂上有政策下有對策，銀行都要做生意架，佢地都已經由之前既H+1.7%，改到去H+1.28%，最近仲攪埋個首年1.68%定息計劃出黎，多多少少將個加息既影響減低。狗頭就好期待往日個H+0.65%喇。

仲有，等跌撈底，係有成本既，一係租樓既成本，二係睇錯市既風險成本。試幻想下，假如，假如啫，美國佬加多幾次息之後，發覺個經濟真係頂唔順，一個UPSIDE DOWN突然同大家講話要減息刺激經濟，仲等緊機會入市既你，心情會係如何呢？

總結一大堆狗噏，大家活在一個將來是未知數既世界，唯一知道既係，住，係必需既。未有樓而有能力買到樓既朋友，睇好後市既，咪買間大囉；睇淡既，咪買間細囉。今日你仲可以賭佢跌，但係唔知你聽日仲賭唔賭得起。

買滙豐好過買樓？

首先利申下，標題所講並非狗頭狗見，而是湯博士近日所提出的高見。
原文轉載於始。
大致意思就是有個對夫婦有1200萬在手，聽完湯博士講，滙豐三年到150，就1200萬all in 滙豐，接著跟業主簽訂三年租約，三年後再睇買唔買樓。
計下數，1200萬滙豐，用現價75元計，假設無槓桿，股息回報約為5.4%，即一年收息約65萬，三年195萬。
手持1200萬現金，基於今天過千萬物業只準五成按揭的規則下，假設該夫婦目標物業的價格約為2000萬。市場上一個2000萬的物業，大約每月租金為4萬左右。
如果咁計，租樓後每月還有約1.4萬作儲蓄，other things being constant，三年後便有大概有50萬。
講到呢到，好似唔錯喎，住既質素可以保持之餘又有點錢可以儲下，好deal喎。仲有，滙豐仲會聽湯博士話，三年後見150。到時手持2400萬股票，又有好多選擇囉。

好啦，好既一面講完，就到相反既一面，凡事都要諗worst scenario嘛。滙豐呢，唔好講當年33咁極端，前年就試過插到50左右，咁即係1200萬得番800萬。當然，如果滙豐到時繼續派番65萬一年俾該對夫婦，咁佢地咪繼續租樓日日賺囉。但係上市公司，好難講喎，大家都估唔到滙豐都要供股啦。

其實講左咁多，想帶出既係應唔應該把一家人居住既福祉，放哂响一間5號仔？手持1200萬，就算睇淡樓市，可唔可以買番層細價放租，買幾條公司債，再分些少錢去買佢最愛既滙豐呢？係，滙豐到150時我賺唔盡，但係咁樣做既話現金流好管理左之餘，風險又分散左，按我既狗見就一定會咁做。

諗深一層，湯博士咁多億身家，肯家有更多高明既理財方法。從細價樓爆煲論到滙豐三年一五零，又真係幾吸引到眼球，幾有娛樂性既，無論細價樓有無爆，或者三年後滙豐到唔到150，湯博士的目的可能都已達到。

打完成篇文，腦中不禁浮現出一句「認真便輸了」。

逝去領展如何留得住

領滙，一個大家又愛又恨既名字。
愛既，多年黎從其股價及股息進帳甚豐。
恨既，多年黎小市民亦向其進貢甚豐。
今天，領展走了，佢以230億賣了17個商場俾以基滙資本為首既財團。

不如我地趁今天回顧下，如果一位小市民於第一日領滙上市就買一手咁大把，佢既投資回報又可否抵消貴左既買餸錢？
話說阿陳仔當年10.3抽到一手領滙，盛惠5,150個大洋。去到今日，領展個價去到69.6，值34,800。唔計股息執左29,650，持貨12年計，每年賺約2,500，加埋幾里股息，即係個個月多兩三百買餸，夠唔夠就見人見智囉。

新東主係私募基金，駛左230億買件貨返黎，幾可肯定既係佢會再執靚啲場，叫個更高既租，引入更多連鎖店。無計，鬼叫佢地俾得起貴租，又識得將成本轉嫁俾消費者。你地咪試下好似以前鬧領展咁鬧囉，人地又無上市，唔一定要顧咁多企業形象，你估下人地理唔理你？

有人話要政府回購返啲商場喎。你諗諗，以前未有領滙，房委會個個月燒納稅人既錢貼堆商場，已經要俾人詬病。難得攪左場大龍鳳，一腳伸哂啲場出去俾人地，人地又攪到有聲有色仲執唔少。反正啲人要鬧要嘈，矛頭都唔係指住房委會，而係班有錢收就唔多怕俾人鬧既生意人，俾著係你，又會唔要攬番舊野上身？

領滙又好領展又好，鬧左十幾年，話唔定大家會有一日掛住佢？

你唔理財 財唔理你 （一）

最近，有兩位友人在分別在不同的飯局時問筆者一些跟理財有關的問題，對話如下﹕

個案一

• 友人A﹕我最近有做康X的友人勸我加按層樓，套錢出黎投資。你點睇？
• 筆者﹕你幾錢買，今日又值幾錢？
• 友人A﹕佢幫我查過，今日值五百萬，我百六萬買。
• 筆者﹕之前有無加按過？
• 友人A﹕我都唔知咩黎，好似好大風險咁，無攪過喎。
• 筆者﹕你擔心既風險係咩？
• 友人A﹕唔知呀，借多咁多錢，樓價一跌銀行會唔會收我樓架……
• 筆者﹕都有咁既可能既。咁咪唔好攪囉。
• 友人A﹕但係我個朋友又講到好著數咁喎，咁按舊錢出黎，一啲放咩銀行特別戶口賺息，一啲就搵佢幫手買啲基金收息，一來一回樓都唔駛出錢供喎。
• 筆者﹕聽落唔錯喎。
• 友人A﹕但係我睇佢FACEBOOK，好似好高人工咁，公司又年年都去唔知邊度旅行，啲錢肯定係响啲客度黎架啦。
• 筆者﹕咁都唔奇既。
• 友人A﹕係囉，咁你話做唔做好？
• 筆者﹕不如我解釋加按同轉按既做法俾你聽先好無？
• 友人A﹕其實我都聽過，不過都係唔多明，邊有咁著數銀行會俾咁多錢你架。
• 筆者﹕咁不如你上網搵下資料先，你GOOGLE轉按，應該有好多資料。
• 友人A﹕會唔會有幾萬個網頁結果出黎架？
• 筆者﹕咁你咪睇頭幾個囉。
• 友人A﹕唉……我仲係覺得好大風險咁。
• 筆者﹕你擔心既風險係咩？

以上既對話大概重覆幾次，我亦都嘗試搵機會講解多點加按、轉按及買基金的實際做法，洐生費用和相關風險，但友人就好似聽唔入耳咁，無題問，而都係繼續強調「覺得好大風險」。跟著我轉去其他話題了。

各位讀者，你有無試過咁既情況，而你又係點處理呢？

下回有另一個案分享。

苦澀的青春 跑步

我喜歡跑步。

還記得小時候，家住的公屋跟街市有一段約六、七分鐘的距離，每次阿娘買漏野，小弟就要出動趕往街市補貨。一來一回，大概一公里左右吧，日子有功，到初中時既長跑課，都能夠名列前矛，跟住仲入埋校隊。當初入校隊，鬼火咁興奮，諗住今次仲唔出人頭地！點知，無論你係籃球、足球、排球、手球、甚至乎係短跑既校隊隊員，大家都覺得你係運動健將，受萬人景仰。唯獨係長跑運動員，就仲係差啲咁，唔係話你悶就係個人古怪，出校外攞到奬返黎都無人理。久而久之，自己都開始覺得跑步無意思。

人生匆匆，畢業後都十幾年，玩過很多其他運動，兜兜轉轉，最近一兩年又跑返步，仲會報下唔同地方既馬拉松玩下。年紀越大，就越發覺跑步好處多。

一．受傷機會比其他運動相對低。

二．經濟實惠！有對鞋就得。唔出國跑，香港本地都有大把比賽玩。

三．唔駛約人都跑得，人到中年，個個有家有室，你懂的。

四．效率高。跑一個鐘，運動量都已經可以好夠。

五．諗到再寫

睇下過多幾年，究竟會唔會有其他既諗法，定係會一路跑，跑到世界各地都有我既腳毛！