首先，你要有個老婆，有勇氣生個細路，仲有閒錢養部車。常言道，香港地買車容易養車難。其實養部車究竟有幾難？
第一難一定係個車位。按二零一九年初既統計，全港領牌車輛既數目為78萬個，同期泊車位既數目只係得差唔多76萬個，而係呢76萬個車位係已經包括公眾停車場、私人停車場、臨時停車場、設有收費錶的路旁泊車位及不設收費錶的路旁泊車位。計埋啲街邊位都唔夠一車一位，人都仲話可以住劏房，車就無得泊劏位啩。在供不應求既情況下，車位一來唔會平，二來難搵。
香港一般屋苑既車位租金，大概從二千到四五千不等。當你咁好彩，住個屋苑泊車位唔貴，三千蚊個月，不過你唔駛開心住，有無位先？小弟曾經有個朋友，响大西北某大屋苑排車位排咗年半都排唔到，結果佢就要泊住响一個距離屋企三個輕鐵站既車場，執筆時應該仲係……其實養車都係求方便啫。
好啦，屋企個泊位無問題，大家仲要諗埋出街個泊位。响外國，個個大既商場或者郊區實會跟個幾乎一望無際既車場。返到香港，排完隊入到車場，唔係要轉十幾層樓高轉到頭暈，就係考驗駕駛技術，要轉一啲陰森狹窄既彎位。九龍灣既MEGABOX，西貢既信和場，相信各位爸爸司機都講得出幾個極品車場。另外，相信各位都會試過等車位時叫老婆仔女落車入商場食嘢先，自己泊好車入到餐廳就剛剛好埋單既經驗。當然，都有好既車場，又大又好泊，例如尖沙咀既海港城，有海景得黎又唔貴，廿零蚊個鐘。
搞完個位仲有其他。假設買架普通1500CC樓下代步細車仔，一炮過唔駛供，每月開支如下表。慳慳地，五千零蚊都應該勉強落到樓，求神拜佛唔好HIGH到人或者俾人HIGH到。如果係要供車，仲要係一兩成既首期計劃，每月過萬開支就是基本了。
講到呢度，養架車又貴又難搵位，何苦呢？作為一個中佬，每次上車關埋門，感覺到屋企到未必有既私人空間同寧靜；一踩油門，拖個波又過個彎，人車合一；一家大細出車，出面就熱辣辣，老婆小朋友响車涼住冷氣大大聲唱歌玩遊戲，跟住就一片蔚藍的天空，萬里無雲……
一切都係值得既。各位中佬，比心機搵錢，剩錢，生錢。ENJOY，共勉之。
